Мусылман адамның ең тийкарғы ўазыйпасы ийман келтириў болса, сол ийманның ярымы пәклик пенен болатуғын екенин бизлерге пайғамбарымыз саллаллаҳу алайҳи ўасаллам тәлим берген.

Динимизде пәкликке итибар ҳаққында Пайғамбарымыз Муҳаммад саллалаҳу алайҳи ўасаллам: «Пәклик ийманның ярымы есапланады», -деп, пәклик ийманның ярымына теңлестирилгенин айтып өткен. Демек, динимизде азадалыққа, пәкликке жоқары дәрежеде итибар берилгенин билсек болады. Бул ис, кеўил, ийман иси болыўы менен бирге, бендениң ибадатының қабыл болыўында әҳмийетли орын тутады. Демек, инсанның пүткил денеси, кийими ҳәм ҳәтте ибадат орны да пәк болыўы шәрт. Пәк болыў дегенде, кийетуғын кийиминен баслап аяқ-кийимине шекем итибар берип, денесин азада тутып, үлкен-киши көзге көринетуғын, көринбейтуғын бәрше патаслықлардан аўлақ болыўы керек. Қала берди үйимиз иши, мәҳәллемиз, көше бойлары, жумыс ҳәм жәмийетлик орынлар бәршеси азада болыўы шәрт.  Динимизде пәклик, азадалық жолында исленген ҳәр бир ис жоқары баҳаланады ҳәм оны ислеген адамға үлкен әжир саўаплар, жоқары мәртебелер бар. Бул ҳаққында Қураны кәриймде: «… Аллаҳ пәклениўшилерди сүйеди»-делинген Тәўбе сүреси 108-аятында.

Тақыятас районы "Муҳаммад Мурад ийшан" жаме мешити имам-хатиби Яқуб Жумамуратов